Watumiaji wa usafiri wa mabasi ya umma ya UDART sasa wataweza kuongeza pesa katika kadi zao kwa kupitia M-PESA, Vodacom inakuwa ndiyo kampuni ya kwanza ya simu kuwapatia wateja wake uwezo wa kuongeza pesa katika kadi za kusafiria katika mabasi haya ya UDART.
UDART walitangaza kusitisha tiketi za karatasi na hivyo kuhimiza watumiaji wa usafiri huu mpya kununua kadi ambazo ndizo pekee zitatumika, hatua hii iliacha changamoto moja tu kwamba kuongeza pesa katika kadi ama kujua kiasi cha pesa kilichobaki katika kadi yako ilikubidi kupanga foleni katika kituo kitu ambacho hakikuwa kizuri sana kwa watumiaji.
Vodacom wameliona hilo na kuamua kuleta huduma ya M-PESA kwa wateja wake ambao wanatumia UDART, kuanzia sasa wateja wa Vodacom hawatahitaji kukaa foleni kusubiri kuongeza salio katika kadi zao UDA bali wataweza kufanya hivyo kwa kutumia M-PESA.
Kuongeza salio katika kadi yako ya UDA fuata hatua zifuatazo:-
1. Piga *150*00# chagua LIPA KWA M-PESA,
2. Chagua DART,
3. Weka namba ya kumbukumbu ambayo ni namba ya kadi yako ya DART,
4. Weka KIASI (Mfano 2000, 5000, 10000 n.k),
5. Weka PIN yako ya M-Pesa,
6. Bonyeza 1 kukamilisha muamala. Utapokea ujumbe mfupi kuthibitsha muamala wako
