WATU wawili wapo katika hali mbaya baada ya kupigwa risasi wakati wakitazama mechi ya Kombe la Ng’ombe kati ya Durban na Black Fire kwenye Uwanja wa Mashine ya Maji Mtongani, Temeke jijini Dar.
Kwa mujibu wa habari kutoka eneo la tukio, watu hao Abdallah Nachu na mwingine aliyefahamika kwa jina la Joe walipigwa risasi na mkazi mmoja wa eneo lenye nyumba zinazozunguka uwanja huo ambaye hakutaka mashabiki wasimame katika uzio wa nyumba yake.
“Kila siku huyu jamaa huwa anakataza watu kusimama jirani ya uzio wake wa michongoma na hata mpira ukipigwa kwenye nyumba yake huwa hataki, sasa leo (jana) alipoona watu wamesimama eneo hilo alitoka na kuwapiga risasi.“Mmoja amepigwa risasi ya tumbo na mwingine amepigwa ya mkononi na wote wamewahishwa hospitalini,” kilisema chanzo chetu.
Baada ya tukio hilo, mashabiki walivamia nyumba hiyo na kuchoma moto gari moja huku wakitaka kumpiga mtu aliyewapiga risasi mashabiki hao. Hata hivyo aliokolewa na Polisi mahali hapo haraka kutoka kituo cha Temeke.
Alipotafutwa Mkuu wa Polisi Mkoa wa Kipolisi Temeke, Andrew Satta hakupokea simu na hata alipotumiwa ujumbe mfupi hakujibu.
