SIMBA itafanya kikao muhimu wiki hii kujadili mambo mazito juu ya timu likiwamo suala la mkataba mpya wa kocha mkuu, Mserbia Goran Kopunovic.
Lakini Kamati ya Usajili inafikiria kufanya jambo ambalo kama likifanikiwa huenda Mnyama akatisha.
Mbali ya straika Mnigeria ambaye wameanza kumchekecha, Simba wamemhakikishia nafasi ya kurudishwa mshambuliaji wao, Raphael Kiongera aliyeko Kenya kwa mkopo, lakini pia imeanza mazungumzo na mawakala wakubwa watatu wa Afrika wanaouza wachezaji Ulaya.
Habari za uhakika kutoka kwa wakubwa wenye ushawishi mzito kwenye kamati hiyo ya usajili wa wachezaji wa Simba, ni kwamba wametoa kazi hiyo kwa mawakala ambao wameanza kuleta majina ya awali ya washambuliaji hao ambao wataletwa nchini kufanyiwa majaribio kabla ya kupewa mkataba.
Kamati hiyo imewaelekeza mawakala hao kwamba inataka mastraika mahiri wenye umri wa wastani wa Afrika ambao wamekwama kucheza soka la kulipwa Ulaya.
Vigogo hao wanaamini kwamba wachezaji hao wanaoshindwa Ulaya watakuwa kwenye fomu kuliko wale wanaotamba kwa sasa kwenye Ligi ya Bongo ambao wameokotwa kiholela tu kwenye nchi za Afrika Mashariki.
“Kuna mastraika wengi sana tena wa gharama za kawaida kwenye nchi za Afrika ya Kati na Magharibi ambao wanakosa nafasi Ulaya lakini wapo kwenye fomu, tunaweza kuwalipa kiasi na wakatufanyia kazi ya kuiibua Simba,” alisisitiza kiongozi mmoja ambaye amewahi kuifanyia umafia Yanga.
Endapo dili hilo litafanikiwa, Mwanaspoti limehakikishiwa straika atakayepatikana atapewa jezi ya mmoja kati Waganda wawili; Dan Sserunkuma na Simon Sserunkuma huku kura nyingi zikimuangukia Simon ambaye anaonekana hajafanya lolote tangu alipoonyesha kiwango kikubwa katika mechi ya Nani Mtani Jembe mwaka jana.
Mwenyekiti wa Kamati ya Usajili ya Simba na kundi la marafiki wa Simba, Zacharia Hans Poppe, amekiri kuwepo kwa mchakato huo. Hans Poppe alisema wanajipanga kufanya maboresho ya kutosha katika kikosi chao ambapo endapo watapata mshambuliaji mwenye uwezo mkubwa ndiyo wataangalia nani wa kuachwa kati ya ndugu hao wawili.
“Hatuwezi kumuacha mchezaji kabla ya kupata mbadala wake, nikweli tunatafuta mshambuliaji mwenye uwezo lakini bado kila kitu kipo katika mchakato, ni mapema sasa kusema wapi tumefikia tutaweka wazi tukifikia sehemu nzuri,” alisema Hans Poppe.
Mipango hiyo inalenga kuirejesha Simba katika makali yake ambayo msimu huu yameonekana kupotea kiasi cha kutokuwa katika matumaini ya ubingwa.
