Raisi wa
Burundi Pierre Nkurunzinza akipeperusha bendera kuashiria kuanza kwa
safari za treni ya kisasa katika kituo cha Reli cha Dar es salaam jana
huku Raisi Jakaya kikwete na viongozi wengine wa nchi za Afrika
mashariki wakishuhudia.
TRENI nne
za kisasa za mizigo mali ya Shirika la Reli nchini (TRL) zinazokwenda
nchi nne za Ukanda wa Kati zimezinduliwa jana jioni Dar es Salaam kwenda
kwenye nchi hizo, tukio lililoshuhudiwa na marais na wawakilishi wa
nchi husika.
Nchi hizo
ni Burundi, Jamhuri ya Kidemokrasia ya Kongo (DRC), Rwanda na Uganda
ambapo mwenyeji wao Rais wa Tanzania, Jakaya Kikwete aliongozana nao
kuzindua treni hizo, ikiwa ni moja ya mikakati ya kuendeleza Ukanda wa
Kati.
Uzinduzi
wa treni hizo, ulitanguliwa na mkutano wa marais hao waliokutana jana
jijini Dar es Salaam, kuzungumzia masuala mbalimbali ya uwekezaji kwenye
ukanda huo.
Mkutano
huo unaendelea leo, ambapo marais hao watazungumza na wawekezaji
mbalimbali. Marais waliokutana ni pamoja na mwenyeji wao Rais Jakaya
Kikwete, Rais Yoweri Museveni wa Uganda, Pierre Nkurunziza wa Burundi,
Kenya iliwakilishwa na Waziri wa Mambo ya Nje, Amina Muhammed na Rwanda
iliwakilishwa na Waziri wa Miundombinu, James Musoni na DRC
iliwakilishwa na Waziri wa Miundombinu, Justine Mwanangongo.
Akizungumza
kwenye ufunguzi wa mkutano wa marais hao, uliohudhuriwa pia na baadhi
ya mawaziri, Rais Kikwete alisema mradi mwingine wa ujenzi wa reli mpya
ya Ukanda wa Kati inayoanzia Dar es Salaam hadi Msongati utaanza
kujengwa Juni mwaka huu.
Ujenzi wa
mradi huo utakamilika baada ya miaka minne, na lengo lake ni kuendelea
kuziunganisha nchi za ukanda huo ili ziweze kukua zaidi kiuchumi na kuwa
na tija kwa maendeleo yao.
Rais
Kikwete alisema reli hiyo ni muhimu kwani ni kiungo kati ya nchi hizo na
kwamba ujenzi wake unaanzia Dar es Salaam-Isaka-Kigali- Kitega/Keza
hadi Msongati na unatekelezwa na mkandarasi M/s CANARAIL/GIBB Africa.
Alisema
ujenzi huo utakapokamilika, utakuwa kiungo muhimu na bora kwa
usafirishaji wa mizigo inayotoka bandari ya Dar es Salaam kwenye nchi
hizo na kwamba utapunguza gharama za usafiri kwa njia ya barabara.
“Huu ni
mradi mkubwa, ukianza utafungua uwekezaji kwenye ukanda wetu huu wa
Kati, lakini tunafanya uchunguzi ili kuona uwezekano wa ujenzi wa reli
nyingine ya Isaka, Mwanza, Tabora, Kigoma, Uvinza, Msongati, Kitega na
Kaliua kwenda Mpanda”, alisema Rais Kikwete.
Alisema
mradi wa ujenzi wa reli hiyo mpya ya kisasa, hautaua reli ya awali ya
Kati, kwani nayo iko kwenye hatua za ukarabati kwa kuimarisha ubora na
kuifanya reli hiyo iwe ya kisasa zaidi.
Akizungumza
jinsi ya kuimarisha Ukanda huo, Rais Kikwete alisema ni lazima nchi
hizo ziweze kuzalisha umeme wa kutosha na kwa bei nafuu, kwani
rasilimali za kuzalisha umeme huo zipo.
“Tuna
rasilimali za kutosha kuzalisha umeme utakaokidhi mahitaji kwa nchi
zetu, kikubwa ni nidhamu ya kusimamia ndio itakayotufanya Ukanda huu
kuwa na umeme wa kutosha na hata wa ziada tutakaoweza kuzalisha na kuuza
nje, ila cha ajabu nchi zetu zote kwa sasa hazina umeme wa kutosha,”
alisema Rais Kikwete.
Akimwakilisha
Rais wa Rwanda, Paul Kagame, Waziri wa Miundombinu, James Musoni
alisema maoni ya Rais Kagame ni kuona maendeleo ya kiuchumi katika
Ukanda wa Kati na kwamba mkutano huo unaongeza nguvu na utulivu katika
ushirikiano.
Alisema
mashauriano ya mara kwa mara katika ngazi ya wakuu wa nchi yanasaidia
kuharakisha na kuongeza juhudi za kujiletea maendeleo na kwamba, Rwanda
ipokushirikiana na washirika wengine katika Ukanda wa Kati.
Waziri wa
Mambo ya Nje wa Kenya, Amina Mohammed (pichani) aliyemwakilisha Rais
Uhuru Kenyatta, alisema Kenya inashiriki kuonesha mshikamano wa agenda
ya jukwaa la mkutano wa Wakuu wa Nchi katika Ukanda wa Kati na
wawekezaji na kumpongeza Rais Jakaya Kikwete kwa mpangilio mzuri wa
mkutano.
Waziri
Mohammed alisema suala la sekta ya usafirishaji ni muhimu kwa maslahi ya
nchi za ukanda huo na kwamba mkutano huo utawezesha kubaini mianya
iliyopo katika sekta hiyo na ambayo inahitaji kuzibwa kwa manufaa na
faida ya wananchi wa nchi hizo.
Alibainisha
pia gharama za usafiri ni kubwa kati ya asilimia 30 na 40 na kwamba
kuna haja ya wadau kujadiliana na kurekebisha mapungufu hayo na kuahidi
kuwa Kenya itaendelea kusaidia uboreshaji wa sekta ya usafiri kwa
manufaa kibiashara na kuvutia wawekezaji zaidi katika Ukanda huo wa
Kati.CHANZO:HABARI LEO
